ഞങ്ങളേക്കുറിച്ച്

എൺപതുകളുടെ തുടക്കത്തിലാണ് വികാസിന്റെ പിറവി. കുറച്ച് ചെറുപ്പക്കാരുടെ ഒത്തുചേരലും കലർപ്പില്ലാത്ത സ്നേഹവും ചേർന്നൊരു കൂട്ടായ്മ. കയറിന്റെയും കരിമണ്ണിന്റെയും നാടായ ചവറയിൽ കഴിഞ്ഞ 40 വർഷമായി ഒരുക്കിയെടുത്ത സാംസ്കാരിക പശ്ചാത്തലം നാടിന്റെ ഹൃദയവുമായി ബന്ധപ്പെട്ടതാണ്.

ഇവിടെ തീർത്ഥാടനം പോലെ വന്നുപോയ മലയാളത്തിന്റെ മുൻനിര എഴുത്തുകാരുടെ എണ്ണം അത്ര വലുതാണ്. അവരുടെയൊക്കെ അനുഗ്രഹാശിസ്സുകളോടെയാണ് വികാസിന്റെ വളർച്ച. വൈക്കം ചന്ദ്രശേഖരൻ നായർ, തിരുനല്ലൂർ കരുണാകരൻ, ഒ.എൻ.വി എന്നീ ഗുരു കാരണവന്മാരുടെ പേരുകൾ എടുത്തു പറയേണ്ടിയിരിക്കുന്നു. ഇപ്പോഴും കൂടെയുള്ള ചവറ കെ.എസ്.പിള്ള വികാസിന്റെ ഭാഗമാണ്. പ്രശസ്തരായ 125 എഴുത്തുകാർ ഇവിടെ പ്രഭാഷണം നടത്തിയിട്ടുണ്ട്

നാൽപ്പതു വർഷം വികാസ് ഇടപെടാത്ത മേഖലകളില്ല. സേവനത്തിന്റെ, കാരുണ്യപ്രവർത്തനത്തിന്റെ വലിയൊരു ചരിത്രമുണ്ട് വികാസിന്. ജീവിത സാഹചര്യം കൊണ്ട് മംഗല്യഭാഗ്യം ലഭിക്കാൻ ബുദ്ധിമുട്ടായിരുന്ന 20 പെൺകുട്ടികളുടെ വിവാഹം വികാസ് ഏറ്റെടുത്തു നടത്തി. കഴിഞ്ഞ 35 വർഷമായി തിരുനെൽവേലി അരവിന്ദ് കണ്ണ് ആശുപത്രിയുടെ ആഭിമുഖ്യത്തിൽ നടത്തി വരുന്ന തിമിര ശസ്ത്രക്രിയയിലൂടെ നൂറുകണക്കിന് മനുഷ്യർക്ക് കാഴ്ച നൽകി. മിക്ക വർഷങ്ങളിലും നിരവധി മെഡിക്കൽ ക്യാമ്പുകൾ, ചികിത്സാ സഹായ പദ്ധതികൾ എന്നിവയും സംഘടിപ്പിക്കുന്നു

നിരവധി വിദ്യാർത്ഥികൾക്ക് പഠന സൗകര്യമൊരുക്കുന്ന വിദ്യാഭ്യാസ സഹായ പദ്ധതി (വിവിധ എൻഡോവ്മെന്റുകളുടെ സഹായത്തോടെ) ഏറ്റവും വലിയ ജീവകാരുണ്യ പ്രവർത്തനമാണ്. വികാസ് നേതൃത്വം നൽകുന്ന ജോസ് ഫൗണ്ടേഷൻ ക്യാൻസർ രോഗികൾക്കായി നടപ്പാക്കി വരുന്ന പദ്ധതിയിൽ 35-ഓളം പാലിയേറ്റീവ് ചികിത്സ വേണ്ടിവരുന്ന ക്യാൻസർ രോഗികൾക്ക് മരുന്ന്, പോഷകാഹാരം തുടങ്ങിയവ അവരുടെ വീടുകളിലെത്തിക്കുന്നു. 10 സന്നദ്ധ പ്രവർത്തകരുടെ നിയന്ത്രണത്തിലാണ് പ്രവർത്തനം.

വികാസിനൊപ്പം പതിനായിരം പുസ്തകങ്ങളുമായി വികാസ് ലൈബ്രറി, ശക്തമായി പ്രവർത്തിക്കുന്ന വികാസ് വനിതാവേദി എന്നിവയുണ്ട്. തനത് പരിപാടികൾക്ക് പുറമെ വികാസ് നടപ്പാക്കുന്ന പരിപാടികൾക്ക് ഒപ്പം അവർ നിൽക്കുന്നു. വികാസ് വനിതാവേദി വലിയ പിന്തുണ കേന്ദ്രമാണ്. 25-ലധികം കുട്ടികൾ അടങ്ങുന്ന ബാലവേദി എന്നിവയൊക്കെ വികാസിനെ നാടിന്റെ അവിഭാജ്യ ഘടകമാക്കുന്നു. നാടിനോടൊപ്പം ചേർന്നു നിൽക്കുന്ന അവരുടെ സങ്കടങ്ങളും സന്തോഷങ്ങളും അറിയുന്ന ഒരു സമൂഹത്തെ നവീകരിക്കുന്ന സാംസ്കാരിക സ്ഥാപനമായി വികാസ് തുടരുകയാണ്.