ചവറയുടെ
സാംസ്കാരിക മുഖശ്രീ

1984 ജനുവരിയിലാണ് വികാസ് കലാസാംസ്കാരിക സമിതി ചവറ ഭരണിക് കാവിൽ രൂപം കൊണ്ടത്. പതിനാറോളം ചെറുപ്പക്കാരുടെ നീണ്ട കാലത്തെ പരിശ്രമഫലമാണ് ഒരു സാംസ്കാരിക വേദിക്ക് തുടക്കം കുറിച്ചത്. ആ കാലഘട്ടത്തിൽ ചവറയിൽ സാംസ്കാരിക സമിതികൾ കുറവായിരുന്നു. എന്നാൽ 1980 കളുടെ അവസാന ഘട്ടം പുതിയ കലാ- സാംസ്കാരിക സമിതികളും വായനശാലകളും എല്ലാ സ്ഥലങ്ങളിലും മുളച്ചുപൊന്തി. ആദ്യവർഷം മുതൽ വികാസിന്റെ സാംസ്കാരിക സമ്മേളനങ്ങൾ മലയാളത്തിന്റെ പ്രധാനപ്പെട്ട എഴുത്തുകാരെ കൊണ്ട് സമ്പന്നമായി. അതുകൊണ്ട് തന്നെ വികാസ് ജനശ്രദ്ധ നേടി. ഒരു സാഹിത്യകാരനും ഒരിക്കലും മറക്കാൻ പറ്റാത്ത അനുഭവവും അതോടൊപ്പം അല്പം അമ്പരപ്പുമായിരിക്കും ചവറ വികാസിന്റെ ആതിഥ്യം സ്വീകരിച്ച് ചവറ എന്ന കൊച്ചു ഗ്രാമത്തിൽ എത്തുമ്പോൾ. ഓരോ വീടുകൾക്ക് മുമ്പിലും നിലവിളക്ക് കത്തിച്ചു വെച്ച് എല്ലാ എഴുത്തുകാരെയും എതിരേറ്റ് വേദിയിൽ എത്തിക്കുന്ന അപൂർവ്വതയാർന്ന വരവേല്പും എഴുത്തുകാരനെയും എഴുത്തിനെയും സ്വീകരിക്കുന്ന രീതിയും ഒരുപക്ഷേ ചവറയിൽ മാത്രമാണ് കാണുക. അതോടൊപ്പം വികാസിന്റെ സാഹിത്യ സമ്മേളനങ്ങളിലെ സമ്പന്നമായ ആസ്വാദക സദസ്സും എഴുത്തുകാരെ അമ്പരപ്പിക്കും. സാഹിത്യ, സാംസ്കാരിക രംഗങ്ങളിൽ മാത്രമല്ല സേവന, ആരോഗ്യ, ജീവകാരുണ്യ പ്രവർത്തനങ്ങളിലും മാതൃകാപരവും പ്രയോജനപ്രദവുമായ നിരവധി നേട്ടങ്ങൾ ഉണ്ടാക്കുവാൻ ചവറ വികാസിന് കഴിഞ്ഞു.